Вақтни ушлаб бўлмайди. Кечагина мусобақани бошлаган футболчилар бугун чорак финалнинг сўнгги баҳсларига саф тортишади. Тайланд давлати бир қатор ёш иқтидорларни кашф қилмоқда. Жуда хоҳлардики, улар орасида Ўзбекистон вакиллари ҳам бўлса.
Ҳа, бунинг учун ярим финалга йўл олиш керак. Шундагина дунё скаутлари назарига тушиш мумкин.
Бугун Бангкок шаҳридаги "Rajamangala National Stadium" ўйингоҳида БАА ҳамда Ўзбекистон олимпия терма жамоалари ярим финалга чиқиш учун кураш олиб боришади. Ўйиннинг қиймати жуда катта. Ўртага Токио-2020 чиптасининг бошланиши тикиляпти. Ютқазсак, уйга қайтамиз, ютсак омадимизни кейинги ўйинда синаб кўрамиз.
Араблар доим жисмоний жиҳатдан биздан орқада бўлмаган, улар 120 дақиқа тинмасдан югура олишади. Бугун ҳам шунақа бўлади.
Бу сафар улардан фақатгина тактика ва индивидуал маҳорат эвазига олдинга чиқишимиз мумкин. Руҳият ҳам керак! Бошқа йўлимиз йўқ! Бугун охиригача "ташашиш" лозим!
Эслатиб ўтамиз, ўйин Тошкент вақти билан 18.15 да бошланади. Мазкур жуфтлик ғолиби ярим финалда Саудия Арабистони билан учрашади.
Нарига жуфтликда Жанубий Корея термаси Иорданияни қабул қилади. Бу ўйин соат 15.15 да бошланади.
Биз эса, термамизга омад тилаб қоламиз!