"Ливерпуль" клуби бош мураббийи Юрген Клопп Англия чемпионати доирасида "Эвертон" жамоасига қарши ўйинда жиддий жароҳат олган ҳимоячи Виржил ван Дейк ҳақида фикр билдириб ўтди.
"Бу вазиятлар бир-бирига ўхшаш. Ўйинчилар бошидан ўтганини мустақил англаб олиши учун бундай пайтда якка ўзи бўлишни истайди. Мен буни билиш учун анчадан буён ишламоқдаман ва хабарим бор.
Мен ҳам жароҳат олганман, менда ҳам адашмасам ҳудди шундай жароҳат бўлган. Бу гапириб ўтириш учун вақт ажратадиган пайт эмас.
Албатта, у билан алоқа ушлаб турибмиз. Биз ёнидамиз ва у буни билади. Уни яхши хотин эрини қамоқхонадан кутгани каби кутиб қоламиз", - дейди Клопп.
Эслатиб ўтамиз, учрашувнинг 6-дақиқасида "Эвертон" дарвозабони Жордан Пикфорд голландиялик футболчини ўз жарима майдонида оёғига зарба бериб қўпол равишда йиқитди.
Ван Дейк ўйинни давом эттиришга уриниб кўрди, бироқ 11-дақиқада Жо Гомес унинг ўрнига майдонга туширилди. Ҳакамлар VAR тизимига мурожаат қилган ва у ерда ўйиндан ташқари ҳолат аниқланган. Пикфорд четлатилмай қолган.
Кейинроқ ван Дейкнинг тиззасидаги пайлари узилгани ва жарроҳлик амалиётига ётиши кераклиги маълум бўлди.