Тақвим бўйича 14-30 октябрь оралиғида юртимизда U-19 тоифасидаги Осиё чемпионати бўлиб ўтиши керак. Гарчи карантин тартиби кучайтирилган ва Суперлигада яна танаффус юзага келган бўлсада, ЎФА миллий жамоа қатори ёшлар термасига ҳам йиғин олиб бориш шароитини яратиб берди. Темур Кападзе шогирдлари мазкур машғулотлар доирасида миллий жамоа (2:3) ва «Бухоро» (2:2) клубига қарши ўйинларда майдонга тушишди. Хўш, навбатдаги йиғин жамоага нима берди? Бош мураббий Темур Кападзе билан суҳбатда шу масалага ҳам қизиқдик, албатта.
- Юртимизда карантин қоидалари қайта жорий этилгач, Суперлига баҳслари вақтинча тўхтатилди, лекин қўл остингиздаги жамоа йиғинда иштирок этди, барибир. Асосий савол - машғулотлар жараёнидан кўнглингиз нечоғли тўлди? Шогирдларингизнинг жисмоний ва индивидуал тайёргарлигида муаммо йўқми?
- Бу борада баъзи ташвишланарли ҳолатлар йўқ эмас. Зеро, ўйинлар бир маромда давом этмаяпти. Албатта, Суперлигадаги тўхталишлар ва Биринчи лиганинг кеч бошланиб, яна танаффус олгани номзод футболчиларнинг умумий ҳолатига маълум даражада таъсир қиляпти, барибир. Яна футболчиларни кузатиш ишлари бузилди. Шунга қарамай, йиғин давомида футболчиларнинг жисмоний ва индивидуал тайёргарлигини талаб даражасига олиб чиқишга уриндик. Ўйлайманки, айни пайт бўлажак турнирда қатнашадиган барча жамоаларда шундай ҳолат ҳукмрон. Муҳими, вазиятдан келиб чиқиб, мусобақага яхшироқ тайёргарлик кўриш мақсадида қўлдан келганича иш олиб боряпмиз. Қувонарлиси, Суперлига баҳсларига қайта старт берилди. Энди жисмоний тайёргарлик ҳам, ўйин амалиёти ҳам жойига тушиши керак. Ўзи йиғин ташкил этишдан кўра, спарринг-рақиб топиш қийин эди. Шукрки, йиғин доирасида миллий жамоа ва «Бухоро» клуби билан куч синашиш имконияти яратилди. Мени хурсанд қилгани, футболчиларимиз миллий жамоа вакиллари олдида ўзларини йўқотиб қўйишмади, уларга муносиб қаршилик кўрсатишди. Алоҳида таъкидлашим керак, айнан миллий жамоа билан ўйин ниҳоятда фойдали бўлди. Биринчидан, йигитларда ўз кучларига ишонч анча ортди. Иккинчидан, кучли рақибга қарши учрашувда камчиликлар яққолроқ кўзга ташланади. Заиф томонларимизни айни ҳозир аниқлаб олганимиз яхши. Энди кузатилган хато ва камчиликларни бартараф этиш устида изланамиз.
- Билишимизча, кейинги йиғин сентябрь ойига режалаштирилмоқда. Унда хориж жамоаларига қарши ўртоқлик учрашувлари ўтказилиши ҳам мумкинми?
- «Ўртоқлик» масаласида иш кетяпти. Аслида терма жамоани мусобақага тайёрлаш бўйича аниқ режага эга эдик. Масалан, октябрь ойигача қатор турнирлар ва ўртоқлик учрашувларида майдонга тушишимиз кўзда тутилганди. Афсуски, пандемия режаларни бузиб юборди. Кўрамиз, эҳтимол, навбатдаги йиғинда Суперлиганинг кучли жамоаларидан бири билан ўйнаш имконияти туғилар... Ҳозирча аниқ гап айтишим қийин. Аввало, Суперлига биринчи давраси тугашини кутамиз. Шундан кейин янги режалар тузиб, шу бўйича иш олиб борамиз. Қолаверса, мусобақа старти яқинлашган сайин иштирокчи термалар юртимизга кела бошлайди. Балки турнирдан аввал халқаро «ўртоқлик» ташкиллаштириш имконияти топилар... Масалан, Малайзия термаси турнирдан олдин ўртоқлик учрашуви ўтказиш ниятини билдирди. Шунга ўхшаш таклифлар йўқ эмас. Хуллас, вазиятдан келиб чиқиб, иш тутамиз. Ўйлайманки, тайёргарлик борасида катта муаммо юзага чиқмайди. Асосийси, номзод футболчилар стартга соғ-саломат етиб олишса, бас. Албатта, қўлдан келганича ҳаракат қиламиз. Мақсад - олдимизга қўйилган вазифани уддалаш баробарида халқимиз олдида юзимизни ёруғ қилиш ҳамда чиройли ўйинлар билан уларни қувонтириш.
- Гуруҳдаги рақибларни ўрганиш жараёни қандай кетмоқда? Табиийки, уларда ҳам йиғинлар ва ўртоқлик учрашувлари ташкиллашда ўзига яраша муаммолар мавжуд.
- Афсуски, бу борада кичик қийинчиликлар юзага келяпти. Рақибларнинг Осиё чемпионати саралаш босқичи доирасидаги ўйинлари видеотасмаларини топдик. Яъни ҳозирча ихтиёримизда шу тасмалар бор, холос. Менимча, улар худди биз каби шароитда шуғулланишмоқда. Бироқ машғулотлар ёки клубларга қарши кечадиган учрашувлар видеоёзувини топиш қийин. Шунга қарамай, рақиблар ҳақида маълумот излашдан тўхтамаяпмиз. Бу борада алоҳида иш олиб бораётган ходимларимиз бор. Улар ижтимоий тармоқлар орқали рақиблар қачон ва қандай йиғин ўтказишларини аниқлаб, барчасини кузатиб боришади. Ҳозирча гуруҳдошларимизга боғлиқ катта янгилик йўқ. Тўғри, яқинда Эрон термасида бош мураббий ўзгарди. Нима бўлганда ҳам, кузатишда давом этамиз, балки мусобақа яқинлашгани сайин жамоалар йиғинлар ва ўртоқлик учрашувларига кўпроқ эътибор қаратар... Шундагина рақибларни яхшироқ ўрганиш имконияти туғилади. Менимча, бу масалага ҳам улгурамиз, албатта.
- Про-лигада саноқли ўйинлар ўтказилгани, Ёшлар лигаси эса икки бора тўхтаб қолганини инобатга олсак, иқтидорли ёшларни топиш катта муаммога айлангани - айни ҳақиқат. Бундай шароитда фақат карантиндан аввал кўздан кечирган футболчиларга ишонч билдиришингизга тўғри келмайдими?
- Карантиндан аввал икки бор - декабрь ва январь ойларида йиғин ташкил қилинди. Уларда деярли 80 нафар футболчини синаб кўрдик. Энг муносиб йигитларга кейинги йиғинда ҳам имконият берилди. Афсуски, ҳозирги шароитда ҳудудларга бориб, футболчиларни кузатиш имконияти йўқ, ҳисоби. Лекин селекция ишлари бир дам ҳам тўхтагани йўқ. Зеро, чемпионат ўйинлари ўтказилмаса ҳам, жамоалар ўз қароргоҳидаги машғулотларда ишлади. Хуллас, клублар бош мураббийлари билан доимий алоқадамиз, улар ўзларини кўрсатаётган ёшларни тавсия қилишлари мумкин. Яна номзодларнинг функционал ва жисмоний тайёргарлиги, қаерда қандай ўйнаши бўйича ҳам фикр алмашяпмиз. Шунга асосан янги номзодларни ҳам синаб кўришга ҳаракат қиламиз, албатта.
- «А» гуруҳида Эрон, Индонезия ва Камбоджа термаларига қарши ўйнаймиз. Бу ёш тоифасидаги ЖЧ-2021га Индонезия мезбонлик қилишини инобатга олсак, мазкур рақибнинг тайёргарлиги яхшироқ бўлса керак...
- Футбол ҳеч қаерда бир жойда тўхтаб тургани йўқ. Мунтазам ўсиш ва ривожланишда. Демоқчиманки, ҳар бир рақибга ҳурмат билан қарашимиз керак. Индонезия термаси Осиё чемпионати саралашида ниҳоятда тартибли ўйини билан кўзга ташланди. Бунда мураббийнинг меҳнати катта. Лекин айтганимдек, ҳозир рақибларнинг айни дамдаги кучи ва ҳолати тасвирини аниқлаш имконияти йўқ. Ўйлайманки, ҳар бир жамоа турнирга жиддий тайёргарлик кўради, барибир. Ўзимдаги маълумотларга таяниб айтсам, Эрон термаси қолган икки рақибимиздан ҳам кучлироқ. Турнирни эса айнан форсларга қарши учрашув билан бошлаймиз. Биласиз, бундай мусобақаларда 1-ўйин катта ахамият касб этади. Шуни инобатга олиб, аввало, Эрон термаси ҳақида маълумот тўплашга уриняпмиз. Тўғри, жамоанинг янги бош мураббий қўл остида қандай ўйнаши номаълум. Умид қиламанки, турнирни ғалаба билан бошлаб, юришни юқори кайфиятда давом эттирамиз.
- Бу ёш тоифасидаги футболчилар ҳиссиётга тез берилишади. Уларга мухлислар қаршисида ўйнаш қўшимча куч бағишлармиди? ...
Давоми бор. Ушбу СУҲБАТни тўлиқ ҳолда InterFUTBOL.uz сайтида ўқишингиз мумкин