Тайланд давлатида икки ҳафтадан бери давом этаётган AFC U23 Championship мусобақаси ниҳоят, бугун ўзининг ғолибларини аниқлаш учун катта саҳнага чиқади.
Ярим финалнинг икки учрашуви бугун ниҳоясига етади ва финалчиларнинг номи маълум бўлади.
Дастлаб, Тошкент вақти билан соат 15.15 да Саудия Арабистони ҳамда Ўзбекистон терма жамоалари ўзаро кураш олиб борса, кейинроқ соат 18.15 да Австралия - Жанубий Корея баҳси бошланади.
Ҳа, биз шундай босқичга етиб келдикки, битта ғалаба қозонсак кифоя қилади. Яъни, мазкур тўртта термага икки мартадан (ярим финалда енгилса 3-ўрин учун) ўйнаш имкони берилади. Улардан қайси бирини ютса, Токио-2020 олимпиадасига йўлланмани олади. Бу жуда катта имкон дегани. Иккита ўйиннинг биттасини юта олишимиз зарур!
Анчадан бери бунақа яқин келмагандик, муҳим мусобақаларнинг эшиги ёнига.
Бугун вужудни жамлаб олиб, диққатни бир жойга қўйиб - ишқибозлар, ёру-дўстлар, ота-она ва шу Юрт учун майдонга чиқиш керак футболчиларимиз. Кўряпмизки, бошқа рақибларнинг савияси ҳам деярли бир хил. Бунақа пайтда ким руҳий устун ва жипслашса ютади.
Яна бир неча соатлардан кейин Бангкок шаҳрида "Rajamangala National Stadium" ўйингоҳи миллионлаб ишқибозларнинг нигоҳини ўзига қаратади. Балки, кўз ёш ҳам тўкдирар. Тўкилса ҳам қувонч кўз ёшлари бўлса эди?!
Барчангизни ТВ қаршисига чорлаб қоламиз, зеро бунақа ўйинлар кам бўлади.
Термамизга омад ёр бўлсин!