Бугун Евро-2020 мусобақаси саралаш ўйинларининг 3-тури бошланади. Бугун А, В, D, F ва G гуруҳларидаги ўйинлар бўлиб ўтади.
Болгария термаси Чехия майдонига сафар қилса, Черногория ўзида Косово билан ўйнайди. Ушбу гуруҳ пешқадами Англия мазкур турда дам олади.
Мазкур кечанинг марказий ўйинларидан бирида В гуруҳи пешқадами Украина термаси Сербияга қарши баҳс юритади. Люксембург эса Литва майдонида меҳмон бўлади. Миллатлар лигасида иштирок этаётган Португалия эса бу турда ўйнамайди.
D гуруҳида 100 фоизлик натижа қайд этаётган Ирландия термаси Дания билан муҳим ўйинда иштирок этса, гуруҳ аутсайдерлари Грузия ва Гибралтар ўзаро масалага ойдинлик киритишади.
F гуруҳи фаворити Испания термаси Фарер оролларига сафар қилади. Швеция эса Мальта билан масалага ойдинлик киритади. Яна бир ўйинда Норвегия термаси Руминияга қарши тўп тепади.
Шунингдек, бугун G гуруҳида ҳам ўйинлар ўтказилади. Шимолий Македония ўзида Польшани қабул қилса, Исроил термаси Латвияга сафар қилади. Австрия эса Словения билан ўйнайди.