2020 йилги футбол мавсумида катта машаққатлар эвазига суперлигадаги ўрнини сақлаб қолган «Андижон» клубида маркетинг борасида бир қатор ўзгаришлар амалга оширилди, деб хабар қилмоқда жамоа матбуот хизмати.
Клуб янги мавсум олдидан ўз логотипини янгилади. Янги логотипни яратишда кўк, қизил ва оқ ранглардан фойдаланилган. «А» ҳарфи кўринишидаги логотипда Заҳириддин Муҳаммад Бобур ҳайкали ва бургут (жамоа лақаби) тасвирланган.
Шунингдек, жамоа ўз ўйинларини ўтказиб келадиган «Соғлом авлод» стадиони номи ҳам «Бобур Арена»га алмаштирилди.
Маълумки, Ўзбекистон Республикаси Президентининг «Соғлом турмуш тарзини кенг татбиқ этиш ва оммавий спортни янада ривожлантириш чора-тадбирлари тўғрисида»ги Фармонида Андижон шаҳридаги марказий стадион номини «Бобур Арена» деб номлаш таклифи илгари сурилган эди. Мазкур ўзгариш орқали Фармоннинг ижроси таъминланди.
Таъкидлаш керак, дунёдаги кўплаб стадионлар тарихий шахслар номи билан аталади. Бунга Монакодаги Луи II стадиони, Истамбулдаги турк халқининг миллий қаҳрамони Мустафо Камол Отатурк номи берилган Олимпия стадиони ёки Грознийдаги Ахмат Қодиров шарафига қайта номланган «Ахмат Арена»ларни мисол келтириш мумкин. Энди улар сафига Андижондаги «Бобур Арена» ҳам қўшилди.
Жисмоний тарбия ва спорт вазирлиги
Матбуот хизмати
Андижондаги "Соғлом авлод" стадиони номи "Бобур Арена"га ўзгартирилди
Ўқилган: 1707