Хабар берганимиздек, 6 август куни “Бунёдкор” академияси майдонида Вадим Абрамов мураббийлик қилаётган Ўзбекистон миллий терма жамоаси Тимур Кападзе қўл остидаги Ўзбекистон – U-19 ёшлар терма жамоасига қарши назорат – синов баҳси ўтказди.
Мазкур ўйинда тажриба маҳоратдан устун келиб, миллий терма жамоамиз 3:2 ҳисобида иродали ғалабага эришди.
Учрашув борасида тўхталадиган бўлсак, ўйинни фаол тарзда бошлаган Тимур Кападзе шогирдлари Улуғбек Ҳошимов ва Руслан Розиев 11 метрли жарима зарбасидан урган голларидан сўнг, 2:0 ҳисобида олдинга чиқиб олишди.
Биринчи бўлимда маҳоратли ҳужумчи Бобир Абдухолиқов битта жавоб тўпини киритди ҳамда ёшлар терма жамоаси танаффусга 2:1 ҳисобидаги ғалаба билан йўл олди.
Танаффусдан сўнг, ҳар икки жамоа мураббийлари таркибда бир қатор ўзгаришларни амалга оширишди.
Ушбу ўзгаришлар эса Вадим Абрамов шогирдларига самара келтирди. Боиси, айнан захирадан майдонга туширилган Темурхўжа Абдухолиқов пенальтини аниқ амалга оширган ҳолда, ҳисобни тенглаштирган бўлса, 2-бўлимнинг илк дақиқаларидан майдонда ҳаракат қилган Азизбек Турғунбоев ғалаба тўпини киритди.
Якунда Вадим Абрамов шогирдлари тажриба маҳоратдан устун эканлигини исботлашди ва бош терма жамоамизнинг 3:2 ҳисобидаги ғалабасини таъминлашди.
Мазкур ўйинда “Навбаҳор” аъзоларидан ҳимоячи Игорь Голбан ҳамда ярим ҳимоячи Аббос Ғуломов миллий терма жамоамиздаги дебютларини нишонлашганини ҳам таъкидлаш жоиз.
Жумладан, тажрибали ҳимоячи Голбан бошланғич таркибда майдонга тушиб, биринчи бўлим давомида майдонда тўлиқ ҳаракат қилган бўлса, Ғуломов танаффусдан сўнг, захирадан майдонга тушиб, тўлиқ 45 дақиқа ўйнади.
Шунингдек, дарвозабон Ўткир Юсупов ва ярим ҳимоячи Азизбек Турғунбоев ҳам 2-бўлимнинг бошланишидан ўйин якунига қадар майдонда ҳаракат қилишганини ҳам айтиш лозим.
Жамоамизнинг яна бир аъзоси, ярим ҳимоячи Исломбек Исоқжонов эса майдонга тушмади.
“Навбаҳор” – U-21 ёшлар жамоамизнинг маҳоратли ярим ҳимоячиси Улуғбек Акназаров эса Ўзбекистон – U-19 ёшлар терма жамоаси таркибида танаффусдан сўнг, майдонга тушиб, тўлиқ 45 дақиқа тўп сурди.
Ўзбекистон миллий ҳамда U-19 ёшлар терма жамоалари навбатдаги, 2-назорат баҳсини 9 август куни ўтказишади.
Назорат учрашуви
6 август
Ўзбекистон МТЖ – Ўзбекистон - U-19 ЁТЖ - 3:2 (1:2)
Голлар: Б.Абдихолиқов (27), Т. Абдухолиқов (63- пен.), А.Турғунбоев (77) – У.Ҳошимов (10), Р.Розиев (22- пен.).
Ўзбекистон МТЖ (бошланғич таркиб ): Машҳуржон Муҳаммаджонов, Ислом Қобилов, Дилшод Аҳмадалиев, Игорь Голбан, Ҳусниддин Ғофуров, Нурилло Тўхтасинов, Жасур Ҳасанов, Санжар Қодирқулов, Шароф Муҳитдинов, Лутфулла Тўраев, Бобир Абдихолиқов.
Ўзбекистон U-19 ЁТЖ (бошланғич таркиб): Абдувоҳид Неъматов, Одилбек Абдумажидов, Аслиддин Тоштемиров, Саидазамат Мирсаидов, Бектемир Абдуманнонов, Диёрбек Раҳимқулов, Мурод Хожамбердиев, Даврон Анваров, Отабек Жўрақўзиев, Улуғбек Ҳошимов, Руслан Розиев.
“Навбаҳор” ПФК матбуот хизмати
Голбан ва Ғуломовлар МТЖда дебют қилишди
Ўқилган: 1858