Агар бу бошқа мавсум бўлганида эди, Лео Месси революцияда қатнашмаган бўларди.
Мухлисларсиз ўтган бу мавсумда Мессининг ўзи ҳаракатга тушишга қарор қилди. У жаҳлини тийиб юрди. Аввалига Неймарни олиб келиш ваъдаси бажарилмади, кейин эса чемпионлик “Реал”га бой берилди.
“Биз мавсумни бундай якунланишини кутмаган эдик, аммо бу бизнинг ҳозир қандай ҳолатда эканлигимизни кўрсатади. Биз жуда кучсиз ўйин намойиш этдик” – деган эди Месси “Осасуна”дан учралган мағлубиятдан сўнг.
“Бавария” билан ўйиндаги 8:2 ҳисобидаги мағлубият эса уни қуюшқондан чиқишга мажбур қилди.
Бу ҳақида журналист Марсело Бэклер айтиб ўтди. У бир пайтлар Неймарнинг “ПСЖ”га ўтишини ҳам биринчи бўлиб айтган эди. “Барса” трансферлари ҳақида гапирганимизда у ишончли манба ҳисобланади.
Esporte Interativo га ёзган мақоласи бутун дунёга тарқалиб кетди. Месси “Барселона”дан кетишини ёзган эди у. 2021 йилда эмас, ҳозир.
Яқинда берган интервюсида у сўзларини тушунтириб берди: “Мавсум бошида Месси юқори маошли шартнома эмас, кучли лойиҳа қизиқтиришини айтган эди. Ҳозир эса совринсиз мавсум якунланиши ва “Бавария”дан қолган оғриқдан сўнг унда ишончсизлик пайдо бўлди. Балки “Барселона”сиз ҳам совринлар юта олар?
Унинг раҳбариятдан жаҳли чиққан ва ҳафсаласи пир бўлган. У кетишни хоҳлайди. “Барса” эса нима қилишини билмайди, чунки уларда келажак учун аниқ лойиҳа йўқ. Қанчалик ҳайратланарли бўлса ҳам, у кетади. Қаерга кетишини эса билмайман. Ҳозирги иқтисодий танглик вақтида ҳеч ким унга 700 млн евро тўлай олмайди, лекин “Барселона” ҳам унга ишонч билдирмаётган Мессини ушлаб қололмайди. Унинг шунча қилган хизмати учун қарорини ҳурмат қилиш керак.”
Вақти-вақти билан бундай трансферлар амалга ошиб турган. Луиш Фигу “Барселона”дан “Реал”га ўтган, Дэвид Бекхэм “Лос-Анжелес Гэлэкси”га ўтган, Неймар “ПСЖ”га кетганди. Агарда Месси бирорта Европадаги жамоага ўтса, юқоридаги трансферлардан ҳам жарангдорроқ бўлади.
